AD DOM. GOWER, COLL. MAGISTRUM,
NISI tuam jampridem benevolentiam et laudatam ab expertis audivissem, et expertus ipse sæpissime laudassem, et pudor et tristitia conscio mihi silentium indixissent: at enim V. R. dum coram patrono, amico, patre, provolvor, te non dubitat impetrare audax dolor per accepta olim beneficia, per effluentes lacrymas (et hæ mentiri nesciunt) perque tuum isthunc celeberrimum candorem, quem imprudens læsi, solicitus repeto ut peccanti ignoscas, et obliteres crimen, ut non solùm ad condiscipulorum mensam, sed ad magistri gratiam restituatur, favoris tui studiosissimus,
CARMEN DEPRECATORIUM AD EUNDEM.
IRATAS acuit dum læsus Apollo sagittas,
Neglectas renovat mosta Thalia preces;
Qualescunque potest jejuno promere cantu;
Heu mihi non est res ingeniosa fames!
Grana neges, alacri languet vis ignea gallo,
Deme laboranti pabula, languet equus.
Latrantis stomachi sterilis nec pascis hiatum
Daphni, nec arentem Castalis unda sitim.
Tum bene lassatur Flaccus cum dixerit Ohe!
Pieriasque merum nobilitavit aquas.
Jejuni depressa jacet vel Musa Maronis,
Flet culicem esuriens qui satur arma canit.
O si Maecenas major mihi riserit, O si
Fulgenti solitum regnet in ore jubar,
Crimine purgato pie post jejunia, Musa
Inciperet præsul grandia, teque loqui.
SISTE mero bibulas effuso temporis alas,
Hesternumve minax coge redire diem;
Nil facis; usque volabit inexorabilis ætas,
Canitiemque caput sentiet atque rugas.
I brevis, et properans in funus necte corollas,
Mox conflagrando conde Falerna rogo.
Clepsydra Saturni tua nec crystallina distant,
Dum motu parili vinum et arena fluunt.
Dum loquor, ecce! perit redimitæ gloria frontis,
Dat rosa de sertis lapsa, Memento mori.
Sed tibi, dum nôras nimis properare puellas,
Ut citiùs rumpat stamina, Bacchus adest.
Destituit cæcum subito sol ebrius orbem,
Occasum tremulo narrat adesse rubor.
REVERENDO IN CHRISTO PATRI
VICIMUS, exultans fausto crepat omine Daphnis,
Testaturque bonos nuncia fibra Deos;
Grandius eloquium meditare Thalia, patronum
Quem modò laudâsti, nunc venerare patrem.
Quis putet incertis volvi subtegmina Parcis?
Quis meritos æquum destituisse Jovem ?
Cum virtute tuum crescit decus, aucte sacerdos,
Impatiensque breves spernit utrumque modos.
Qualiter Elæo felix in pulvere victor,
Cui semel ornatas lambit oliva comas,
Suspirans partas queritur marcescere frondes,
Et parat elapsas ad nova bella rotas :
Sic tibi major honos veteres protrudit honores,
Metaque præteritæ laudis origo novæ est:
Phœbææ juvenile caput cinxere corollæ,
Palma vira decuit tempora, mitra senis. M. P.
EPISTOLA EODEM TEMPORE MISSA.
Cum voluntas regia, optimatum consensus, bonorumque omnium studia infulam merenti concesserint, ignoscas, pater reverende quod inter communem populi plausum cliens eò minus ad enarran22
dum sufficiens quò beneficiis plus fuerim devinctus, et tuos in ecclesiâ honores et ecclesiæ à tuis honoribus felicitatem festinet gratulari, favoris tui studiosissimus,
AD FRANC. EPISC. ELIENSEM.
EXORATA boni tribuerunt munera Divi,
Patronique novus tempora cingit honos.
Concedas hilaris repetitum Musa laborem,
Et notum celebres, et mihi dulce decus.
O si te canerem, præsul venerabilis, O si
Fistula cum titulis cresceret aucta tuis,
Æque turba tibi non cederet ima clientum,
Cederet ac numeris optima Musa meis.
Hoc tamen ut meditor, mihi quid nisi vota super-
sunt?
Imbelles humeros nobile lassat onus.
Ergo minor virtus celebretur, dum tibi præsul
Quod laudem superes gloria major erit.
Cum virtutes tuas unusquisque collaudet et honores gratuletur, nostræ V. R. audaciæ ignoscat tua benignitas, si minimâ pollens eloquentiâ, ardentissimo tamen studio accensus, ad communem populi chorum adjungens vocem, cum virum optimum tum benignissimum celebret patronum, qui, tuis maximè devinctus beneficiis, summoperè conatur meritò vocari Favoris tui studiosissimus,
"Quicquid vult, valde vult."
DUM tingit Siculus solis cœlique meatus,
Astra polosque tuos quos sibi condit habet.
Nil facit instantis mortis bellique tumultus;
Usque sed egregium sedulus urget opus.
Non vacat exiguæ curas impendere vitæ ;
Sat sibi curarum Conditor orbis habet.
IN COMITIS EXONIENSIS CRISTAM,
TRITICI FASCEM LEONIBUS SUSTENTATUM.
MDCLXXXIX.
Lemma," Sustentare et debellare."
DUM tibi dat fortes Cybele veneranda leones,
Flavaque collectas addit Eleusis opes:
Invidiâ major, victoque potentior ævo,
I decus, I nostra Ceciliana domus.
Sparge inopi fruges, et pelle leonibus hostem ;
Copia quid valet hinc, quid timor inde, refer.
Pollens muneribus belli vel pacis, habes, quo
Atque homines superes, atque imitêre Deos.
|