ISAAC. CASAUBON. in Epist. ad Card. PERRON. Regis JACOBI nomine scripta. Rex arbitratur, rerum absolute necessariarum ad salutem non magnum esse numerum. Quare existimat ejus Majestas, nullam ad ineundam concordiam breviorem viam fore, quam si diligenter separentur necessaria a non necessariis, et ut in necessariis conveniat, omnis opera insumatur: In non necessariis libertati Christianæ locus detur. Simpliciter necessaria Rex appellat, quæ vel expresse verbum Dei præcipit credenda faciendave, vel ex verbo Dei necessaria consequentia vetus Ecclesia elicuit.-Si ad decidendas hodiernas Controversias hæc distinctio adbiberetur, et jus divinum a positivo seu Ecclesiastico candide separaretur; non videtur de iis quæ sunt absolute necessaria, inter pios et moderatos viros, longa aut acris contentio futura. Nam et pauca illa sunt, ut modo dicebamus, et fere ex æquo omnibus probantur, qui se Christianos dici postulant. Atque istam distinctionem Sereniss. Rex tanti putat esse momenti ad minuendas Controversias, quæ hodie Ecclesiam Dei tantopere exercent, ut omnium pacis studiosorum judicet officium esse, diligentissime hanc explicare, docere, urgere. |